Kultura buat nebe iha memória ba povo ida nebe la mate!
Manifestu Maubere, Fernando Sylvan

Workshop kona ba Patrimóniu Kultural Imaterial

21/09/2016 > Nasionál

Dili, 6/08/2016, Sekretaria Estadu ba Arte no Kultura, liu husi Diresaun Jeral Arte no Kultura, servisu hamutuk ho UNESCO Jacarta hodi realiza workshop kona ba: ” Plano no Desenvolvimentu Salvaguarda ba Patrimóniu Kultural Imaterial” Workshop ne’e hala’o durante loron 4, hahu husi loron 6, to’o 9, Setembro 2016. iha Hotel Garden BEACH, Praia dos Coqueiros.
iha abertura ba workshop ne’e, responsavel Dili Antena Office, iha nia diskursu hateten katak, PKI ne`e kona ba povu/ema, tradisaun, lalaok moris nian, tan ne´e protesaun ba PCI, ne’e especial tambá ida ne`e laos ba objetu no edifisiu maibe ne`e kona ba tradisaun no hahalok kotidianu ema nia no identidade. PKI koalia kona ba tradisaun oral, arte, praktika sosial, rekursu, pratika iha koñesementu ba buat ne’ebé ita iha.
Responsavel Dili Antena Office katak SEAK iha responsabilidade bo’ot hodi kopera ho UNESCO hodi fo salvaguarda ba PKI.
Agradese mos ba SEAK nebe koopera ona ho UNESCO hodi hala’o ona Workshop kona ba PKI, Iha workshop ne`e atu hakbit liu tan importansia PKI iha dezenvolvimentu nasaun Timor Leste nian.
Ikus liu iha diskursu, Sr. Anwar informa mos katak Rezultado husi koperasaun entre SEAK ho UNESCO produz ona livru ida ho nia Titulu: Kultura viva iha Timor, hanesan dokumentu ba Patrimoniu Kultural Imaterial Timor- Leste nian no povu Timor -Leste nian.
SEAC, Dra. Maria Isabel de Jesus Ximenes, nia diskursu hateten katak, kultura nudar identidade nasional ne’ebé nasaun barak mak fo importânsia makas liu ba Kultura. Iha koperasaun ho UNESCO Jacarta ami hamutuk produz ona libru ida kona ba kultura viva iha Timor laran tomak, iha tinan 2013.
Kultura mak sei haforsa ita atu dezenvolve ita nia rai. Kultura nudar ita nia identidade.
Iha loron 15, fulan Junhu 2015, Parlamentu nasional ratifica ona konvesaun 3 mak, Konvesaun iha 1972 – Patrimóniu Kultural Mundial (ba edifisiu sira; ex. Opera house iha Australian, Kakadu husi Northen Territory nst.), konvesaun iha 2003 – konvensaun ba Patrimoniu kultural imaterial no konvesaun 2005 – Expressa diversidade cultural (Industrias criativas, grupu tradicional, rituais nst).
No iha fulan Outubru tinan ne`e sei realiza tan ba dala rua (2), loron Nasional ba Kultura. Tamba iha 14 outubru rekoñese husi Conselho Ministro nudar loron Nasional ba Kultura.
SEAC hateten, Iha workshop ne`e ita hotu hamutuk hodi fahe esperiensia ba malu atu bele fo salvaguarda ba ita nia Património Kultural sira.
Ikus liu SEAC, agradese ba partisipantes sira hotu niana espektativa hodi hakarak aprende no hetan esperiensia foun kona ba PKI, no hakarak atu hatutan tan koñesimentu nebe sei hetan ba ema seluk. Ita preserva kultura ne`e hahu husi rejiaun, nasional no internacional.”

Objetivu husi workshop ne’e: atu rekonhese importansia ba patrimónia kultural immaterial hanesan “ Garantia ba Dezenvolvimentu Sustentavel”
No mos atu aumenta partisipantes sira nia komprensaun kona ba salvaguarda ba patrimoniu kultural immaterial, ne’eb’e dezenvolve ona iha konvensaun ne’e.
No hasae mos partisipantes sira nia komprensaun oinsa mak bele prepara koerensia no kualidade kona ba plano Salvaguarda iha kondisaun ne’eb’e komplesu.

Partisipa iha workshop ne’e SEAC, Dra. Maria Isabel de Jesus Ximenes peritus sira husi UNESCO Jacarta, responsavel husi Dili Antena Office, responsavel kultura husi munisipio 12, respresentante husi instituisaun relevante, konvidadus no funsionarius sira husi SEAC.

Governu Timor-Leste

Design no hala'o boq | Copyright © 2009 Sekretaria Estadu Arte no Kultura