tempu atu nonók / iha hakmatek laran / tempu moris / ba sira be mate ona
Nonók minutu ida, Borja da Costa

Lansamentu Livru "Patrimóniu Moris Komunidade sira nian iha Timor-Leste"

10/02/2014 > Eventu sira

Iha loron 4 fulan Fevereiru 2014, Governu Timor-Leste liu hosi Sekretaria Estadu Arte no Kultura kooperasaun ho UNESCO no National Geographic Traveler halo lansamentu livru ho títulu “Patrimóniu Moris Komunidade sira nian iha Timor-Leste” iha Xanana Reading Room. Tuir mai, inaugura mós Expozisaun Fotografia iha Largo de Lecidere, Dili relativa ho tema ne’ebé hanesan.

Pontu principal balun hosi publikasaun ne’e maka koloka komunidade iha sentro ba proseso salvaguarda Patrimóniu Kultural Imaterial, ba konsekuénsia ne’e, publikasaun inklui sitasaun comunidade Patrimóniu Kultural Imaterial sira nian iha Timor-Leste ne’ebé esplika sira nia badaen no arte ho sira nia lia fuan rasik.

Iha ninia diskursu, Sekretária Estadu Arte no Kultura, Sra. Maria Isabel de Jesus Ximenes, refere katak, hahu hosi tinan 2011 maka Sekretaria Estadu Arte no Kultura servisu hamutuk ho UNESCO ho hanoin atu identifika, Salvaguarda no Promove rikusoin oioin, liuliu iha Patrimóniu Kultural Imaterial ne’ebé kompoin ita nia nasaun, liu hosi realizasaun ba asaun formasaun sira, vizita estudu sira, produsaun no tradusaun ba testu sira ba lian principal servisu nian.

Sra. Sekretária Estado subliña mos katak, eskritóriu UNESCO nian iha Jakarta hala’o kna’ar ne’ebé relevante ba kapasitasaun tékniko kompetente sira no ba sensibilizasaun hosi ajente relevante sira (Governu, funsionáriu públiku sira, Organizasaun naun Governamental sira no membru komunidade sira) ba importánsia patrimóniu kultural hirak ne’e iha dezenvolvimentu sustentável Timor-Leste nian.

Iha fatin seluk, Diretór no reprezentante Eskritóriu UNESCO nian iha Jakarta, Sr. Hubert Gizen, refere katak, ho publikasaun furak ne’e, Timor-Leste hatudu katak nia iha rikusoin no Patrimóniu Kultural Imaterial oioin. Partimónio ida ne’e hanesan buat furak no diak hosi komunidade sira, grupu no indivídu sira no só sira maka bele salvaguarda no passa ba jerasaun futuru. Ne’e sai hanesan mensajen xave ba Patrimóniu Moris Komunidade sira nian iha Timor-Leste, publikasaun ne’ebé fó lian ba povu Timor-Leste no proporciona plataforma ida atu fahe ba mundu ho ninia rikusoin no tradisaun patrimóniu moris ne’ebé oioin.

Hein katak publikasaun ne’e fornese ba komunidade sira iha Timor-Leste, espesialmente ba feto sira no ba joven sira, iha oportunidade atu expresa koñesimentu iha ninia patrimóniu moris nian, fó hanoin ba konsiénsia kona-ba Patrimóniu Kultural Imaterial no ninia salvaguarda ba nível lokal, nasionál no internasionál, Sr. Hubert hatete.

Marka prezensa iha serimónia lansamentu no exposisaun fotografias maka, Asesor hosi Presidente RDTL nian Dr. Roque Rodrigues, Vise-Prezidente Parlamentu Nacionál, Sr. Adérito Hugo, Ministru Educasaun, Sr. Benedito dos Santos Freitas, hanesan Prezidente Timor-Leste NatCom (Timor-Leste National Commission for UNESCO), Ministru Turismo, Sr. Francisco Kalbuadi Lay, Sekretáriu Estadu Komunikasaun Sosial, Sr. Nélio Isaac Sarmento, Sekretáriu Estadu ba Fortalesimentu Institucionál, Sr. Francisco da Costa Soares, Sekretária Estadu ba Apoiu no Promosaun Setór Privadu, Sra. Veneranda Lemos, Secretáriu Estadu Rai no Propriedade, Sr. Jaime Xavier Lopes, Secretáriu Estadu ba Asuntu ASEAN, Sr. Roberto Sarmento, Prezidente UNESCO, Sra. Kirsty Sword Gusmão, Diretór Jeral no Nasionál sira, xefe departamentu sira no funsionáriu sira hosi Sekretaria Estadu Arte no Kultura.

Governu Timor-Leste

Design no hala'o boq | Copyright © 2009 Sekretaria Estadu Arte no Kultura